政情：羅太：國教課程可以商討
早前協助特首梁振英競選而搞到周身唔得閒嘅行政會議成員羅范椒芬（Fanny），依家終於放低選舉工作，可以搵朋友歎吓茶。我哋尋日就咁啱喺中環置地廣場遇到Fanny同朋友飲下午茶，向佢提起最近全城爭議嘅國民教育議題，佢就話希望市民可以明白課程係可以商討嘅。
對於政府推行德育及國民教育科，最近好多學生同家長都反對。Fanny就話其實嗰班喺政府總部抗議嘅學生已經講得好清楚o架喇，就係一定要「推翻」，佢哋只係要達到呢個目標，所以政府講咩都冇用。
讚胡紅玉得體
Fanny嘅行會同事胡紅玉被委任為開展德育及國民教育科委員會主席，日前見傳媒回應國民教育的問題，聲言尊敬學生嘅立場及會繼續聽取意見，Fanny就大讚胡紅玉講得好得體。