中環出更：陳遠航抱埋囡囡搞善事
連續多年舉辦周年匯演為博愛醫院籌款嘅SDM爵士芭蕾舞學院，日前一連兩日喺九龍塘浸會大學上演舞蹈音樂劇，着上精靈可愛舞衣嘅數以百計小豆丁，齊齊跳舞做善事，頓時令大學校園變成開心樂園。博愛主席潘德明、副主席陳李妮（Lily）及學院靚女院長陳遠航（Peony）撐場打氣。Peony抱住一歲囡囡嚟湊熱鬧，笑稱再過多兩年，囡囡就可以喺舞台上表演，齊為慈善起舞喇！
陳李妮係運動靚太
講起跳芭蕾舞，Lily自爆六歲時曾經學過一段時間，佢話只要一着上舞衣、舞鞋時，就覺得好似天鵝咁優雅、咁靚。不過，練舞令到雙腳經常起水泡，最後忍唔到腳痛，只學咗兩年就放棄，得着嘅係學芭蕾舞對佢嘅儀態及打扮影響好大，例如中學時佢係體育女將，好多女隊友成日着到男仔頭咁，但Lily落場後必定堅持淑女打扮。唔講唔知，Lily曾經係香港學界女子籃球代表隊，依家經常喺屋企樓下射籃練波，真係睇唔出佢係運動型靚太。
卓妮