中環出更：小母牛訪川炮製農家菜
施比受更有福，每年都號召城中名人齊到內地探訪農戶嘅國際小母牛香港分會，早前到汶川地震災區四川廣源探訪，小母牛董事葉澍堃（Stephen）、有「快勞夾大王」外號嘅籌委會主席杜振源（Simon）一家、佳能高級副總裁鄧慶治父子、Sony Computer Entertainment香港公司董事項明生（James）等人一齊同行。
今次探訪要傳遞嘅係雞唔係牛，事關小母牛以前捐贈過走地雞畀農戶，點知雞肉好食到家喻戶曉，價錢賣到十六元人民幣一斤咁貴，仲成為當地嘅名種雞添！
今次行程四日三夜，共探訪兩條村莊。回想四年前地震後災區一片頹垣敗瓦，Stephen依然歷歷在目，轉眼災區重建得好好，農戶亦都有自己嘅牲畜同農作物，仲開始秉承小母牛精神，將牲畜轉送其他有需要嘅人。一向為善不落人後嘅Simon，仲即時捐出五位數字善款，支持農戶自力更生。
去到方圓十里都冇餐廳嘅農村，無大廚坐鎮，嘴刁嘅Stephen一樣有好嘢食，事關大家捲起衫袖落菜田採摘當造蔬菜，然後埋鍋自己炒，爽脆嘅豆角，清甜嘅粟米、水嫩嘅豆腐，勝過山珍海味多多聲，加上全村百幾人一齊同枱食飯，場面都幾壯觀。
四川美食以麻辣聞名，Stephen親自炮製嘅餸菜最快清碟，但唔係有咩特殊配方，只係無落辣椒啫！
項明生做翻譯員
James係四川人，今次返鄉下別有一番滋味，佢識講當地方言，所以全程充當翻譯，氹得公公婆婆好開心。James仲贈送遊戲機造型嘅便條紙等文具畀災區學童，見小朋友們綻放童真笑容，長途跋涉嘅艱辛都一掃而空。
卓妮