希臘神話自古相傳，普羅米修斯走去眾神居住嘅奧林匹斯山，為人類偷來難能可貴嘅火種，從此改寫地球歷史，因為火種令世界一片光明，晚間活動由不可能變成夜夜笙歌。經過千萬年演化之後，人類唔再點蠟燭照明嘞，事關美國有一個好偉大嘅愛迪生發明咗電燈膽，自此以後啪一個掣馬上驅走黑暗。
功夫茶究竟想講乜呢？想講嘅就係凡事應該適可而止，電燈膽無疑係極之有貢獻嘅發明，之但係如果濫用就會變成擾人清夢嘅光害。你知啦，極暗同極光都足以令人視覺失靈，你試下傻更更眼定定直視太陽吖，包你唔使幾分鐘雙目失明。
香港話就話以璀璨夜色馳名世界，萬家燈火嘅維港景象令人一見難忘，不過咁喎，若然你屋企附近有幾個大型招牌燈光長開，睇怕你會被折磨到淪為失眠一族，安眠藥都未必幫到你。
好似大角咀一位劉先生咁吖，住所對面地舖新開一間茶餐廳，安裝咗一個巨型LED燈招牌，二十四小時長開不特止，仲要閃呀閃、閃呀閃、閃呀閃，閃個不停嘅燈光直射入屋，搞到劉先生拉咗簾都瞓唔到，幾鬼可憐呀。本報記者以測光器去量度一下啦，嘩，錄得光度係一百八十五勒克斯，比起國際標準高出六倍。根據國際照明委員會建議嘅夜間街道光度，上限係二十五勒克斯咋。
其實，除咗大角咀之外，香港大街小巷都存在或多或少嘅招牌光害。再以荃灣為例吖，一間酒店前嘅LED燈螢光幕徹夜不熄，午夜十二點嘅光度係一百七十六勒克斯，即係超標五倍。醫學界人士話呀，長時間暴露於高頻閃燈之下，會不知不覺擾亂生理時鐘，更加有機會觸發癲癇症，你都咪話唔得人驚！
好嘞，既然光害咁嚴重，係咪應該諗辦法為民除害呀？講到呢家嘢就大劑嘞，原來自命國際大都會嘅香港係冇法例規管o架，燈光污染無論去到乜嘢可怕嘅程度，特區政府官老爺都會耍手擰頭，話無能為力喎。環保署過去兩年雖然接獲四百五十宗有關戶外燈光污染嘅投訴，主要來自灣仔區同油尖旺區，署方嘅處理方法只係派發毫無約束力嘅《戶外燈光裝置業界良好作業指引》，光害製造者束之高閣，睬你都傻。
計功夫茶話齋，點可以容忍光害擾民o架，環保署同屋宇署之類嘅衙門又點可以不聞不問懶成咁o架，冇法例規管燈光污染呢家嘢，講出嚟都笑甩大牙啦。
咁啦，梁朝新政府如果有誠意落實「民生無小事」，麻煩盡快訂立防治光害嘅相關法例，否則失眠一族半夜三更百無聊賴，走去用強力大光燈騷擾禮賓府就唔好啦。