政情：施榮懷幫廠商會搞「私竇」
唔少商會都有「私家飯堂」，方便以飯局會友，一直未有「私竇」嘅中華廠商聯合會，近日亦密鑼緊鼓籌備開設會所餐廳，預計年底開張大吉。會長施榮懷（Irons）話，會所餐廳選址會喺中環廠商會大廈一樓，上址依家係商會企業傳訊部辦公室，面積有幾千呎，足夠擺四、五圍，稍後將安排部門調往其他樓層，騰出地方搞飯堂。
食材狂加價，搞飲食唔容易，但Irons多年前做過酒樓老闆，熟晒行情，加上前會長洪克協幾年前私人捐出幾十萬元畀廠商會，有資金墊底；而一班元老級會員及會董亦舉腳贊成，人力、財力兼備，梗係打鐵趁熱喇。據講大廚都搵埋，據聞喺富豪飯堂界挖角，廠商會近日仲送師傅返內地學煮大江南北美食，認真揼本。
會所餐廳將主攻廣東及福建菜，啱晒港人口味，據聞招牌名都改埋，叫做「福記」。廠商會飯局多到爆，會員再唔使為訂位頭痛喇。