候任特首辦喺新政府上場後隨即結束，特首梁振英（CY）三名「近身」洪綺敏（Cathy）、馮英倫同陳冉嘅去向一直眾說紛紜，其中Cathy早前熱傳加入新世界做公關，馮英倫則係財政司司長政治助理嘅熱門人選。最近佢哋嘅去向終於明朗化，前者加入咗商會做公關工作，後者則出任某間私人機構嘅主席助理，暫時未有計劃加入政府。
CY喺競選特首期間有多名「近身」日以繼夜全力輔選，外間一直預計佢哋會加入新政府同CY再度合作，但原來佢哋對於個人未來規劃都各有打算，其中馮英倫更靜悄悄重投私人市場工作。馮英倫接受查詢時證實，最近喺朋友介紹下加入某私人機構做主席助理，近期仲要出差，但佢冇透露具體係幫邊個機構主席工作。
至於傳媒出身嘅Cathy，原來早喺個多月前開始擔任香港中國商會副總幹事。Cathy話自己強項始終係同傳媒溝通，加上商會只係成立咗三年，以商會歷史來講仲好年輕，所以未來希望多啲同各界聯繫溝通。