政情：爭九東第五席 謝偉俊捍衞理性
立法會選舉進入最後直路，由旅遊界轉戰九龍東直選嘅謝偉俊（Paul），其民調支持度喺最後階段不升反跌，徘徊喺當選同落選嘅邊緣，外間料最後一席喺佢同社民連陶君行、人民力量黃洋達三人之爭。
希望旅遊業界支持
阿Paul話，今次選舉係理性同暴力之爭，又話自己雖然係客家人，但冇打算喺最後關頭大打「鄉情牌」，希望繼續做實事爭取選民支持，又希望旅遊界嘅從業員都支持佢喎！
九龍東共有五個議席，綜合各大民調走勢，民建聯陳鑑林及工聯會黃國健當選在望，反而最後一席至少有三名候選人嘅機會都均等，當中包括有「法律超人」稱號嘅阿Paul，所以佢近日要大打告急牌。阿Paul形容，今次係理性同暴力之爭，因為外間分析最後一席係佢同兩個較為激進嘅候選人之爭︰「究竟要多啲激進嘅人吵吵鬧鬧，定係中產理性代表，呢個冇話對同錯，一切留待選民決定。」