政情:劉江華告急 忽略元朗鄉事票

民建聯喺超級區議會選舉只係派出兩個候選人,賽前被視為大熱門嘅劉江華近日選情告急,多項民調都顯示佢唔係咁穩陣,近日要四出宣傳搶票,仲話自己選情「載浮載沉,命懸一線」。不過,原來佢一直忽略咗元朗鄉事派呢個大票倉,冇着力去發掘票源,呢個票倉嘅代表仲話,其實唔介意支持佢喎。

今次超級選情激烈,差一萬幾千票隨時會出局,呢個時候新界西鄉事派就傳來消息,話劉江華至今都冇拜會過佢哋。有元朗鄉紳坦言,雖然鄉事派喺地區直選會支持番自己人,但超級區議會選舉就絕對係另一回事,叫鄉民投劉江華絕對唔係問題喎。我哋亦搵過新界東部分鄉事派代表,佢哋講法都差唔多。

劉江華回覆我哋話,佢會繼續接觸唔同團體,爭取支持。佢講得咁輕鬆,莫非啲票已經有番咁上下揸拿,所以唔使刻意入鄉拉票?不過,既然鄉事派都唔介意過票畀佢,攞埋都冇蝕底啫。

第一手消息請下載on.cc東方互動iPhone/iPad/Android/Windows Phone Apps