政情：棠哥聲討民記鎅票
立法會選舉就如一場體育競技比賽，一落場連自己人都冇情講，好似連日投訴被友黨鎅票嘅工聯會，榮譽會長鄭耀棠（棠哥）尋日終忍唔住埋怨民建聯（民記），散布工聯會已夠票嘅訊息，搞到工聯會各區候選人都選情嚴峻，陷於出局邊緣，棠哥今次咁高調，似乎真係好不滿。但民建聯主席譚耀宗就解釋，可能係班助選團義工太落力，又慨嘆：「本是同根生，相煎何太急！」
棠哥尋日拉埋旗下四個選區候選人，包括新界西麥美娟（Alice）、新界東葉偉明、九龍東黃國健及香港島王國興齊齊落區，聲言不滿被民記鎅票，跟住各自撕爛手上一張寫住「鎅」字嘅紙，寓意希望選民認清楚民記做緊乜嘢，希望大家千萬唔好以為佢哋夠票，其實四個直選選區都全面告急，一票都不能少。除咗撕紙洩憤，棠哥仲展示一張巨型道具藥水膠布，大嗌畀人鎅得好傷。
歸因幫手抬轎 共享支持者
民記之所以鎅到工聯會啲票，歸根究柢係佢哋以往幫開民記抬轎，大家共享支持者嘅聯絡方法，所以導致今日嘅鎅票局面。棠哥明言，有人不斷向建制派支持者宣稱工聯會已夠票，等選民以為佢哋穩勝而轉投民記候選人。佢仲話鎅票情況喺近兩星期更為明顯，民記不斷鎅走工聯會選票，搞到佢哋要不斷澄清，兼要告急。
正力爭香港島最後一席嘅王國興形容，目前選情好危急，佢自己都未夠票，但就有人喺家訪時話工聯會已經夠晒票，呼籲工聯會會員全部投晒畀民記，咁樣被人鎅票法，依家都唔知點算好。Alice亦話，佢嗰區仲誇張，民記有人未開始選舉已經「出口術」話佢夠票，近日就連工會都入侵埋，真係鎅票鎅到無孔不入。
「本是同根生 相煎何太急」
我哋搵到譚耀宗（譚Sir），佢起初話根本唔知棠哥講緊邊區，當佢知道工聯會係投訴區區都畀民記鎅票時，佢就解釋話，可能係班助選團義工落力得滯，因而喺唔覺意嘅情況下拉票拉過界喎。問到佢會唔會搵棠哥私底下拆掂佢，譚Sir就話，棠哥都冇搵佢，而且呢啲都唔係大問題，最後佢仲留低一句：「本是同根生，相煎何太急！」都係嘅，萬事以和為貴會好啲。