中環出更：舖王囝囝想搞中西醫療中心
生活同健康息息相關，舖王鄧成波四公子、東華三院總理鄧耀邦（Jason）身為中醫相當認同。喺廣州中醫藥大學讀緊中醫學博士嘅Jason話，眼見有女同學長年受女性問題困擾，點知轉咗隻洗頭水之後，所有煩惱消失。又有人受熱症煎熬，原來係臥室過熱，換過睡房後不藥而愈。呢啲真實個案，令Jason更加注重日常生活細節，盡量使用有機產品，仲要不時不食。
醉心研究醫術
雖然Jason讀中醫，但並冇被中醫呢個框框困住自己，佢話中醫唔淨止解作中國嘅醫學，仲要通識叻，古時嘅大夫上至天文地理，下至風水兵法，樣樣都要精。佢近期就搵自己做白老鼠，醉心研究水晶能量療法、經絡療法、自然療法等各種醫術，務求搵到一種最快捷有效嘅混合性療法。Jason話，未來想將家族旗下物業發展成為中西綜合醫療中心，仲會引入民間療方，實行多管齊下提供有效治療。