中環出更：名流設計師齊為仁濟籌款

連續八年舉辦嘅《香港傳藝節‧仁濟慈善晚宴》日前喺灣仔君悅舉行，一眾城中名流靚女及傑出設計師共襄善舉，為仁濟教育服務基金籌得一百二十萬元善款。仁濟副主席嚴徐玉珊貴為籌委會主席，其老公時捷集團主席嚴玉麟慷慨捐贈一點五公升、七九年靚紅酒珍藏拍賣，結果由中策集團主席兼思捷環球主席柯清輝以三萬六千元投得。柯大俠係嚴玉麟囡囡Carmen嘅契爺，兩位大男人出錢出力搞氣氛。
嚴玉麟（左）捐贈靚酒拍賣，由囡囡契爺柯清輝（右）投得。（余素月攝）
嚴玉麟（左）捐贈靚酒拍賣，由囡囡契爺柯清輝（右）投得。（余素月攝）

晚宴出席嘉賓多到數唔晒，包括食物及衞生局局長高永文、中國極地博物館創辦人李樂詩、社交界名人周國豐夫婦及「鮮花公主」龔嬿等，仁濟主席鄭承隆、副主席蘇陳偉香、總理鄭李華熙及周德興等人亦空群而出，仲有前主席李文斌太太何芷韻，場面好墟冚。

時裝騷高貴優雅

當晚節目焦點係由著名時裝設計師何國鉦（Dorian）呈現嘅精彩時裝騷，八名星級名模完美演繹廿四套華麗晚裝，配襯價值逾億元嘅名貴珠寶，盡顯高貴優雅，睇到台下靚太淑女目不轉睛。每年舉辦「十大傑出設計師」選舉嘅傳藝中心校長吳子文話，晚宴目的係凝聚一班傑出嘅設計師，取得個人事業成就之餘，亦不忘發揚濟世利眾精神，回饋社會。

吳子文（右一）號召設計師搞騷籌款，仁濟鄭承隆（左起）、嚴徐玉珊及鄭李華熙瞓身支持。（袁志豪攝）
  • 吳子文（右一）號召設計師搞騷籌款，仁濟鄭承隆（左起）、嚴徐玉珊及鄭李華熙瞓身支持。（袁志豪攝）
周國豐（右）太太黃泳霖（中）生完龍Ｂ近五個月，已火速修身，與龔嬿（左）雞啄唔斷。
  • 周國豐（右）太太黃泳霖（中）生完龍Ｂ近五個月，已火速修身，與龔嬿（左）雞啄唔斷。
何國鉦（中）搞個人時裝騷，城中潮人朱仲賢（右）及太太程瑤（左）猛讚話靚。
  • 何國鉦（中）搞個人時裝騷，城中潮人朱仲賢（右）及太太程瑤（左）猛讚話靚。

晚宴另一高潮係拍賣環節，除咗靚酒珠寶外，仲有清朝雍正皇帝後裔愛新覺羅‧燾健及「中國魚王」宋守友捐贈嘅畫作，宋守友更現身晚宴。仁濟總理吳國榮慷慨解囊，以六萬元投得栩栩如生嘅鯉魚名畫，話要畀囝囝吳崇暉帶返倫敦，等佢讀書時欣賞喎！

卓妮

第一手消息請下載on.cc東方互動iPhone/iPad/Android/Windows Phone Apps