「e學習」 計劃 電腦貴市面五百
「一家一網e學習」計劃旨在協助低收入家庭得到上網援助，但有市民發現計劃提供的產品及服務竟較坊間貴。「同一個牌子、型號嘅電腦，市面賣平成五百蚊一部，咁政府搞個計劃出嚟有乜用？」來自低收入家庭的黃先生指出，早前有意為兒子申請「一家一網e學習」計劃，惟「格價」後發現坊間電腦較為相宜，質疑計劃成效不彰。
資訊科技總監辦公室發言人解釋，兩間推行機構挑選之上網學習電腦難以在價格上作直接比較，因計劃提供免費防毒軟件、文書處理軟件及三年免費維修保養等，更可享有靈活及優惠的付款方式。
不過，發言人強調，稍後會開展中期檢討工作，預計於二○一三年年中完成。
「如果連買電腦嘅錢都畀唔起，送幾多軟件畀我都冇用啦！」黃先生不滿有關計劃本末倒置，認為降低電腦售價是對低收入家庭之最佳援助。