堂堂爵士居然有家歸不得？呢鋪真係瘀皮瘀到上心口咯，無端端做咗一個發配邊疆嘅流亡人士。
功夫茶講緊嘅係七月一日執包袱落台即刻漏夜走埠嘅過氣特首曾蔭權，本報得到消息指出，有關方面向臨天光衰收尾嘅煲呔曾下達「三不禁令」，一不准九月九日立法會選舉之前踏足香港，二不准接觸香港官員，三不准撰寫回憶錄或自傳。所以咯喎，貴為爵士都要好似着草咁流落異鄉為異客，到家陣都藏頭露尾不知所終。
之所以有呢三條禁令，主要係防範呢一個貪腐成性嘅舊時大當家左右亂局。你知啦，今年初特首選舉時，貪曾鬼鬼祟祟盡出陰招力挺掘窿掘深咗嘅候選佳麗唐英年，背後涉及龐大勢力同龐大利益，如果立法會選舉再一次淪為烏煙瘴氣嘅權力板塊攻防戰，新政府好難有效施政啫。為咗顧全大局，有關方面勒令貪曾自我隔離被失蹤，防小人恰似防病菌。
大家唔好怪功夫茶冇口德，明明係爵士都要話佢係小人。無他嘅，功夫茶一向嫉惡如仇，尤其係破壞香港廉潔奉公核心價值嘅不法分子，更加嫉到好似不共戴天之仇。喂，邊個貪遍海陸空呀？邊個歎盡省港澳呀？邊個公幹當遊埠仲要餐餐入住總統套房呀？又係邊個官商勾結政策傾斜明益自己友呀？種種不仁不義甚至涉及營私舞弊嘅勾當，全部出現喺貪曾身上，你唔嫉惡如仇都對唔住自己良心啦，吓話！
講到官商勾結，貪曾被東方報業集團連環踢爆嘅醜聞可能係冰山一角咋。好似佢當日舟車勞頓走去澳門一個沙塵滾滾嘅地盤，拍住富商劉鑾鴻參觀捲入歐文龍巨貪案嘅樓盤「御海．南灣」，你估真係貪過癮咁簡單咩？有冇枱底交易最好由廉署查一查，反正ICAC都開咗檔案咯，順手查找真相囉。
官商勾結通常都會投桃報李，而呢一個李，最明顯嘅係東亞銀行大亨李國寶。寶哥哥連續兩次擔任曾蔭權競選辦主任，然後三父子先後獲頒大紫荊勳章以及太平紳士銜頭。人哋港英時代呀，獲頒勳章或者做太平紳士都要出錢出力做好多善事o架，李家兩位年紀輕輕嘅公子哥兒，何德何能被稱呼為紳士呢？你話唔係政治酬庸都冇人信啦！
至於其他有荷蘭水蓋慰勞嘅曾朋友，一個係有名你叫「煲呔針」嘅鄭經翰，一個係提供深圳豪華曾大屋嘅黃楚標，其他例子多到數唔晒。
消息指出，如果貪曾違反禁令回港，執法部門將會行動。其實計功夫茶話齋，既然防小人如防病菌，最徹底嘅隔離政策莫過於廉署加緊調查，盡快將貪官繩之以法，效果遠勝趕瘟神啦！