政情：李慧琼有霆鋒支持
民建聯李慧琼（Starry）最近喺紅隧附近掛咗一個幾層樓咁高嘅選舉廣告，話說前排有候選人成功感動中資集團捐出紅隧廣告位，結果引起軒然大波，今次Starry再喺另一中資大廈外牆掛廣告，Starry話自己係用市價租嘅，但至於幾多錢佢就唔多清楚，叫大家遲啲去查選舉申報喎！
book到中資大廈外牆掛廣告
聽Starry講，呢個廣告位唔係咁易book到，不過佢就咁啱book到一個黃金檔期，由九月一日開始，一直掛到九月十日。而民建聯近日仲印製咗啲像真度極高嘅模擬選票教選民乜嘢係「一人兩票」添，真係無番咁上下銀彈都做唔到。
除咗銀彈充裕，Starry今次嘅宣傳仲係群星拱照，之前已有傳佢已獲汪明荃同謝霆鋒支持，近日仲有相為證添，不過Starry尋日唔知點解仲係好有保留咁話，係咪成功爭取到對方支持仲係未知之數喎！