政情：投票亂蓋印 嫻姐嚇親
幾日後就係立法會投票日，但好多市民仍然對「一人兩票」一竅不通，好似工聯會超級區議會候選人陳婉嫻同九龍東候選人黃國健（KK），尋日帶備自製投票教材，包括地方直選嘅藍色投票箱及超級區議會嘅白色投票箱，同兩款只印有佢哋嘜頭嘅選票，到黃大仙上邨教啲公公婆婆投票，但點知「雞同鴨講」，笑料百出。
話說有位九十四歲嘅明婆婆對嫻姐話，自己次次選舉都有投票，所以今年亦唔例外。當明婆婆放咗張模擬選票入票箱後，就話：「好，投完票！」嚇得嫻姐即時澄清話：「婆婆，九月九號先至投票，呢個係實習嚟o架咋！」
之後又有街坊喺嫻姐張超級區議會模擬選票上亂咁蓋印，蓋完806號民建聯李慧琼，又蓋其他號碼，嚇到嫻姐面都青埋，即時話：「投畀我嘅話係投807呀，投806冇效o架！」似乎嫻姐係趁機會講明唔過票畀民建聯咁喎。
超級區議會候選名單仲有劉江華、馮檢基、何俊仁、涂謹申及白韻琹。