政情：黃錦星為建橋浸幾日水
推動環保工作唔係得把口，好似環境局局長黃錦星（KS）一直身體力行搞環保，原來KS係可持續發展嘅先行者，早年曾落手落腳參與「無止橋」慈善基金首個內地偏遠農村建橋項目，當時試過喺水中企幾日，用雙手運送石頭建橋，十足佢依家學做問責官員咁，摸住石頭過河。
「無止橋」今年成立五周年，尋日舉辦「橋‧動我心」展覽會，請咗KS、香港基本法委員會副主任梁愛詩、中文大學校長沈祖堯等主禮，其中KS同無止橋早有淵源，主持人爆料話KS早於○五年已參與首個無止橋嘅甘肅毛寺村建橋項目。KS隨後致辭時話，其實早喺差唔多十年前，佢已參與位於毛寺村嘅建橋工作，事關用咗幾年時間籌錢同設計，終於喺○五年夏天做得成喎。
中大即將成立五十周年，沈祖堯就透露，中大會同北京大學合作喺雲南省建橋，到時自己也會摺高衫袖同褲腳幫手，唔知到時KS會否技癢，再度出山指導甚至協助起橋工作呢？