政情：國教風波 累三十會內訌
國民教育（國教）風波愈演愈烈，社會上支持同反對國教嘅聲音非常對立，就連專業人士組成嘅民間智庫「三十會」亦因為呢件事爆內訌。三十會七位理事包括前勞工及福利局政治助理莫宜端、專欄作家龔耀輝等人，最近喺報章聯署反對國教，甚至支持罷課，但行動卻引起會內保守派不滿，覺得佢哋騎劫咗「三十會」個名，預期正反兩派好難共存，未來必定會引發一場話事權爭奪戰喎。
估唔到國民教育風波，竟然會令到一個智庫陷入撕裂狀況，我哋尋日收到一封匿名信，透露三十會未來幾日好可能會發生「兵變」。事緣係有保守派會員不滿以龔耀輝為首嘅一派會員，亂用三十會個名喺報紙登反對國民教育、支持罷課嘅廣告，批評佢哋冇諮詢其他會員意見，完全唔尊重會章程序。
係立場溫和建制派組織
寫信嘅人仲話，三十會向來係立場溫和嘅建制派組織，唔少會員係「深梁」分子，亦有會員想加入政府，好似擔任政府多項公職嘅理事何建宗早前就高調應徵做副局長，今次三十會突然咁搞法，好可能會影響幾位有可能加入政府做問責官員嘅會員喎，但究竟係邊幾位會員有機會入政府，封匿名信就冇提到喇。
有唔同意見好正常
不過，原來搞到咁大件事，三十會召集人李律仁都冇表態，咁我哋當然要問吓佢點化解呢場兵變啦，點知李律仁好老定，話三十會內部間中有唔同意見係好正常，好似以前通過政改方案及最低工資時，班會員都經常有相反意見。佢仲話今次六十幾人聯署，只有七位係三十會理事，好多聯署者都係非會員，所以唔算用三十會名義做聯署喎。
三十會班保守派對聯署反國教咁大反彈，又話兩派難以共存，又話聯署影響會員仕途，講到咁嚴重，李律仁又可以點拆解呢？佢就話支持國教嘅會員都可以聯署，佢個人一定唔會反對，因為三十會會為每位會員爭取發言權。至於係咪影響會員加入政府，李律仁就講咗一句：「依家係做事，唔係做官」，力撐聯署會員。