中環出更：黃楚恒續任中成藥商會主席
近年中藥業愈做愈風生水起，業界新一代陸續當家作主。三十幾歲嘅已故政協常委黃光漢兒子、泉昌董事副總經理黃楚恒（Stanley），日前順利冧莊做香港中成藥商會主席。Stanley家族做北京同仁堂生意，傳到佢已係第四代。冧莊主席咁開心，黃家及業界齊現身就職禮撐場，包括Stanley嘅媽媽、中華總商會婦女委員會主席黃周娟娟，活躍於政商界嘅叔叔黃光輝、哥哥華孚石油董事總經理黃楚基等。
政府啱啱宣布重組中醫藥發展委員會，Stanley話，業界有好多問題要解決，例如政府希望中小藥廠都取得GMP認證，但事實上全港約五百間藥廠，只有不足十間係GMP藥廠，業界將與政府繼續保持密切溝通。嶺南藥廠第三代傳人呂偉強就對仿冒及影射問題好頭痛，佢哋出產風行數十年嘅止痛膏，亦有包裝及顏色近九成五相似嘅偽藥出現，要完全杜絕偽藥真係唔容易。