中環出更：傑青飯聚 諗慶周年活動
過去歷屆獲選為十大傑出青年嘅才俊，好多都喺社會上舉足輕重，好似特首梁振英都係早年嘅傑青之一。傑出青年協會（下稱「協會」）今年成立三十五周年，一班傑青相約喺尖沙咀一間隱世餐廳「Chef Stage」（廚社）邊聚會，邊構思協會未來一連串周年慶祝活動。
廚社老闆娘Dominique與協會副主席甄韋喬（Mickey）係中學同學，主廚朱志良（Eddy）更喺餐飲業界享負盛名，曾任多間星級酒店總廚，有「西餐浪子」之稱。喺Mickey穿針引線下，協會主席洪詠慈（Anna）、上屆主席蕭智剛（David）及副主席鄧智偉（Sydney）齊齊去試菜。
將出版紀念特刊
當晚佢哋品嘗特色fusion菜，先嚟一道清新嘅「薑葱蝦配搭風乾火腿沙律」，再來「龍蝦濃湯配生蠔」，而主菜係燒羊架配肉眼扒，羊肉嫩滑無渣，肉眼味道濃郁。仲有煎鴨肝配車厘茄凍湯，兩者交融恰到好處。大家食完都讚美食精緻獨特，第時包場搞個傑青派對咁話。
Anna預告協會將出版一本紀念特刊，入面有齊歷屆三百一十三位傑青嘅資料，特別之處係刻意印刷三百一十三頁，以紀念歷史一刻。每年一度嘅旗艦活動「明日領袖高峰論壇」及「明日領袖獎」，均由Mickey擔大旗做籌委會主席，希望擴大參與院校嘅數目，培育更多明日傑青。
傑青背景廣泛，好似本身做清潔業嘅Mickey、教育界嘅Anna，甚至的士司機都榜上有名。David話，協會係畀傑青發揮自身優勢嘅平台，當選傑青係服務社會嘅新開始。唔少傑青參選時都怕畀人知，其實選舉保密度相當高，醫學教授Sydney笑言，佢當選嗰一屆，原來有同事亦當選，大家到咗頒獎禮當日先至相認，所以大家放心參選喎。
卓妮