做賊都可以發達，呢鋪真係變身金翅發達鳥！
假如閣下係偷鐵黨，功夫茶雖然唔贊成作奸犯科，不過都要預祝各位偷鐵偷到家肥屋潤，事關家陣多咗唔少偷竊目標，就係通街擺嘅鋁合金警察嘞。假如鼠摸狗盜偷走鋁板警察，一來能夠當廢鐵攞去賣，二來可以剃警方眼眉，對於惟恐天下不亂嘅犯罪分子而言，應該係賞心樂事。
到底乜嘢係鋁板警察呢？件事係咁嘅，警方指新界北去年有三千六百幾宗交通意外，涉及傷亡人數四千七百幾人，較前年上升一成，今年截至七月為止，共有二千二百幾宗車禍，涉及傷亡二千九百幾人。警方鑑於交通意外有上升趨勢，於是推出真人比例一比一嘅鋁板警察執行任務，希望從教育角度令駕駛人士更加小心駕駛，今日起喺三段公路試行，包括吐露港公路、屯門公路以及粉嶺公路。鋁板警察有兩款，一款係手持俗稱影快相嘅檢測車速雷射槍，另一款係手持文件夾嘅黑超交通警。
簡單咁講，鋁板警察扮執法，阻截飛車齋靠嚇。
咁過癮嘅稻草人執法方式，究意係邊一個天才嘅創意發明？功夫茶記憶所及，呢一條賊公計狀元才都唔係第一次獻世o架嘞，分別只係以前用紙板警察守門口，今次用鋁板警察阻飛車，原理萬變不離其宗，都係唔聲唔聲嚇你一驚。
一味靠嚇以求維護法紀有冇用嘅呢？功夫茶本來應該訪問雀仔，睇下佢哋驚唔驚稻草人，可惜功夫茶唔識鳥語，只好憑普通常識想像鋁板警察有幾大震懾作用。想像緊……想像緊……想像完……震懾作用應該係零。
喂，第一次見到鋁板警察就話驚驚地啫，以後見到就唔會再驚o架啦，反而有機會引人犯罪。試想想，若然你係一個罔顧人命嘅飛車黨，明知前面嗰個係裝模作樣嘅鋁板警察，即係冇真人執法啦，你會唔會踩盡油門極速狂飆呢？冇警時分引人飆車最大嘅弊端係，頭搖又尾擺，飄移境界，一個唔覺意就炒大鑊。
功夫茶仲有一樣嘢擔心，聰明笨伯可能為咗防止偷鐵黨偷走鋁板警察，做出一件除褲放屁嘅多餘事：派出兩個真人警察去（目及）實兩個鋁板警察，朝九晚六，唔（目及）唔舒服。出動鋁板警察嘅原意之一當然係節省人手，如果為咗防盜而派人駐守，你話係咪十足十膠粒污染大海嘅後遺症，多膠魚？
當然啦，自命聰明實笨伯嘅執法方式都唔係一無是處嘅，相信唔少遊客會好鍾意走去同鋁板警察影一影合照，咁咪有助促進旅遊業囉！