政情：任啟邦紅得鬼祟
泛民主派最近經常借國民教育議題攻擊建制派，仲話建制派大搞紅色旅行團，資助學生去「洗腦」。不過，原來泛民有口話人，冇口話自己，最近新民主同盟新界東候選人任啟邦就被指搞紅色洗腦旅行團，標榜「紅味」十足，其中一日朝早去「革命基地」井岡山，下晝再去毛澤東住所，夜晚食飯仲要食井岡山風味宴。今次任啟邦真係將泛民講一套做一套嘅精神發揮得淋漓盡致，完全係自打嘴巴。
有讀者踢爆任啟邦喺今年四月復活節假期搞咗個「江西井岡山、黃洋界、贛州、河源四天純玩巴士團」，就咁睇好似冇乜特別，但睇真啲就發覺，行程單張特別用粗體字去介紹井岡山嘅行程，包括去井岡山革命博物館，視察當年共產黨軍政機關及指揮所，仲要去埋毛澤東及賀子珍夫妻住所等，成個旅行團除咗視覺上感受井岡山特色外，仲可以大飽井岡山風味宴，真係遊得出色、食得招積。
自打嘴巴 街坊反感
呢個旅行團好似嫌井岡山唔夠紅，仲去埋黃洋界參觀紅軍營房、紅軍造幣廠。嘩，呢兩處景點都係當年共產黨嘅行軍樞紐，試問呢個團同泛民口中所講嘅建制派紅色旅行團又有乜分別呢？我哋就此事問番任啟邦，佢回應話呢個旅行團唔可以同嗰啲小學生去紅色交流團比較，一來呢個旅行團係自由參與，唔會強迫街坊參加，而且參加得旅行嘅都係成年人，有晒自由意志，本身亦已經有既定政治立場，唔會話去完一次旅行就洗腦喎。
任啟邦仲話，呢個旅行團嘅景點好「紅色」，但班街坊去完旅行後似乎更加反感。既然泛民覺得呢啲紅色旅行團一文不值，而街坊去完又反感，點解仲要宣傳叫街坊畀錢去「受罪」呢？任啟邦咁講有無說服力，相信眼睛雪亮嘅選民都會睇得出。新界東候選名單仲有張超雄、田北俊、葉偉明、陳志全、劉慧卿、黃成智、蔡耀昌、湯家驊、陳克勤、葛珮帆、梁國雄、龐愛蘭、邱榮光、何民傑、梁安琪、方國珊、陳國強、龐一鳴。