中環出更：胡炎松熱講盂蘭勝會
今日係農曆七月十四，街頭又見搭棚燒衣祭拜嘅盂蘭勝會。醉心於推廣潮汕文化嘅潮州商會青委副主任胡炎松（Anven），日前就喺梁顯利油麻地社區中心開講座，解構已被列入國家級非物質文化遺產嘅潮人盂蘭勝會奧秘。一班潮男潮女去撐場，包括吸煙與健康委員會主席劉文文（Liza）、潮商會董余秋偉及Anven哥哥胡豔光。快將喺九月換屆嘅潮商，將新成立文化事務委員會，Anven出任首屆副主任，難怪講起潮汕文化都渾身是勁。
Liza啱啱冧莊做多屆吸煙與健康委員會主席，卓妮問佢有冇再建議政府加煙稅，靚女笑稱：「要睇吓高永文（食物及衞生局局長）點做喇！」Liza同高永文都係潮州「家己冷」，兩位老友以後仲多咗一層工作關係。Liza話，除咗加煙稅仲有好多嘢要做，例如修改法例增加場地管理人嘅責任，唔可以只係勸諭咁簡單。佢又話，煙盒應實行「全煙害警示包裝」，追上國際步伐，希望將十五歲以上嘅吸煙人口降至單位數。