中環出更：霍啟剛揮別包包臉
依家醫學美容先進，面尖尖嘅話好易就畀人誤會去咗整容，尋日卓妮喺「香港大學生內地實習交流計劃2012夏」結業禮上，就遇到快將迎娶跳水公主郭晶晶嘅霍啟剛，見佢fit咗好多，冇晒包包臉，尖尖臉輪廓出晒嚟，皮膚仲滑溜溜添，唔通佢又整……啟剛沒好氣話︰「我瘦咗一排啦！」咁啲皮膚咁好係咪成日幫襯美容院呢？「你估我係女人咩！依家工作好忙o架！」
現時有多項公職在身嘅啟剛，尋日以青年事務委員會委員身份出席活動，加上其他體育界公職，真係分身不暇。不過，最勞心嘅都應該係盤家族生意，事關活動一完，啟剛就迅速到停車場攞車，佢話要趕返南沙開工。
講番佢個全城關注嘅婚禮，啟剛就話大家關心佢當然好開心，但依家專注力都係放喺工作先。有個事業心咁強嘅老公，相信佢位準國寶新娘子郭晶晶都好滿意喇。
葉振都甄韋喬 仔女生性
同樣擔任主禮嘉賓嘅香港青聯主席葉振都一樣係工作狂，家族生意遍布多個範疇，但係佢呢兩年要瞓身搞青聯事務，好彩五個哥哥都好支持，畀佢每日開半日工，幫佢分擔咗唔少工作量。不過，佢最感動係九歲大女都好體諒，事關今個暑假佢忙住搞青聯二十周年活動，無法出門遠行，乖女就自己上網睇吓香港有咩好去處，搵定資料帶爸爸去地質公園輕鬆吓。
講開香港大學生到內地交流，菁英會副主席甄韋喬（Mickey）都有個生性囝囝Baron，趁住中學放榜後去搵咗份暑期工，喺餐廳做侍應。日前Mickey特登去「監場」，平時喺屋企甚少做家務嘅Baron，做起上嚟表現淡定，氹得爸爸呢位「食客」大讚滿意，而Baron稍後會去珠海暨南大學修讀經濟學。
卓妮