係人都知八號風球就唔使返工，所以有唔少打工仔非常渴望打風，偷得浮生半日閒。之不過咁，有人發覺天文台嘅作風好奇怪，硬係返工期間都唔會掛八號，一放工就嘭嘭聲扯高個風球。所以就產生一個陰謀論，天文台竭誠服務嘅對象係聯交所甚至係大財團，以免停工造成經濟損失。
照咁講，環境保護署會唔會都係經濟至上嘅政府部門呢？功夫茶咁問唔係無厘頭o架，事關環保團體踢爆一件事，環保署早年委聘兩間大學研發一套空氣質素健康指數（AQHI），事後居然唔聲唔聲不了了之，地球之友就質疑嘞，可能呢一套健康指數嘅建議涉及停工，對經濟造成壓力，所以環保署按下不表，收咗報告兩年仍然石沉大海。
○八年着手研發嘅係科技大學同中文大學，空氣質素健康指數套用二○○一至○五年醫管局嘅門診數據，以及環保署嘅空氣污染指數，計算出四種空氣污染物嘅風險，包括二氧化硫、二氧化氮、可吸入懸浮粒子同臭氧。指數參考加拿大做法，劃分成一至十級以上嘅風險，數字愈大代表健康風險愈高，並且向四個群組人士提供戶外活動建議，最嚴重係避免或限制戶外活動。簡單咁講，一旦空氣污染搞到香港變咗一個大型毒氣室，保障戶外工作者健康嘅建議係停工。
你知啦，香港始終係一個經濟城市，秒秒鐘都講緊億億聲上落，官商勾結少一日都周身唔聚財，地球之友嘅質疑唔係無的放矢喎。
中大醫學院職業及環境健康學部教授黃子惠指出，通常污染事件發生後十二小時，污染物濃度處於最高水平，但係現行空氣污染指數（API）只反映過去二十四小時平均濃度最高嘅一種污染物，無法反映實際情況，而且API發布之時污染事件已過去，公眾唔能夠採取相應行動避免吸入污染物。
AQHI係一個比較進步嘅指數，時效性比API強，除咗可以協助市民決定是否進行戶外活動，長遠亦可評估香港空氣質素改善情況，如果唔係考慮到經濟有機會由於停工而受損，因乜事幹擺埋一邊不聞不問？如果為咗經濟而導致小市民健康受損，即係草菅人命嘅啫。學似聖經話齋，人若賺得全世界，賠上自己的生命，有甚麼益處呢？
嗯，講講下又要捉番個「氣候逃犯」出嚟鞭屍。冇錯嘞，環保署收咗報告兩年粒聲唔出，當時邊個打骰做特首呀？咪就係曾蔭權囉。好心環保署唔好做氣候逃犯嘅幫兇啦，你唔去改善空氣質素都要畀市民慎防中毒吖嘛，冇陰功！