電視台選舉論壇一向係候選人爭取表現嘅最佳機會，但尋日港島區論壇，竟然唔見獨立候選人勞永樂。勞醫生以獨立人士自居，又無政黨樁腳幫手，照計好靠論壇食胡，因乜大事搞到佢唔現身呢？尋日勞永樂就透過助手回覆，原來佢扭親條腰，依家行動好唔方便，連企都唔可以企咁耐，所以每日落區時間要由四小時減到一小時。臨近投票先至整傷，勞醫生都算出師不利喇！
距離投票仲有十一日，每個候選人都搏晒命作最後衝刺，但勞醫生就要休養，就咁睇好似好蝕底，點知佢助手好有信心話對選情影響不大，仲話街坊好清楚勞醫生份人，唔會因為見唔到佢本人，就唔投佢票喎。腰傷可大可小，究竟要休養幾耐呢，佢助手就話連醫生都唔清楚。如果係咁，大家就要睇實未來幾日嘅候選人民意調查，睇下腰傷影唔影響到佢選情喇。
香港島候選名單仲包括有單仲偕、葉劉淑儀、劉健儀、劉嘉鴻、曾鈺成、鍾樹根、陳家洛、王國興、何秀蘭、吳文遠、許清安、吳榮春，以及何家泰。