選舉論壇經常火花四濺，每位候選人針鋒相對在所難免，但被主持人辣慶就好少見。前晚有線電視搞嘅香港島選舉論壇，新民黨主席葉劉淑儀就好不滿被主持人身攻擊，有欠客觀公允。葉劉仲嬲到寫信去選舉管理委員會及有線電視投訴，希望兩方面都譴責呢位主持嘅言論。
究竟論壇主持講咗乜嘢辣慶葉劉？原來係主持問佢有關黨友黃楚峰嘅事，突然彈咗一句：「一係佢（黃楚峰）戇居，一係你戇居」，葉劉認為呢句說話會影響選民對佢嘅印象；而主持到總結時繼續爆肚，講咗一句「好耐冇做掃把頭嗰啲，就做番掃把頭」，葉劉覺得呢句簡直係侮辱緊佢本人，完全接受唔到，所以先咁嬲焗住寫信投訴。
論壇主持講嘅言論係咪過咗火位，係咪超越咗主持嘅角色，相信公眾自有判斷。不過，葉劉為官多年，有咩風浪未見過吖，今次為咗呢啲口舌之爭而投訴，似乎佢真係動咗真火喇。