政情：馬逢國吸取Tim霍體育經驗
港協暨奧委會會長霍震霆（Tim霍）過去喺立法會開會同發言嘅次數寥寥可數，更遑論要代表業界向政府反映訴求。不過，已棄選立法會嘅Tim霍始終喺體育界有江湖地位，體育、演藝、文化及出版界候選人馬逢國早前就專程同Tim霍見面傾談，事後透露對方非常支持佢，又講咗好多鼓勵說話。當問及對方有乜經驗可以借鏡時，馬逢國笑笑口話會吸取Tim霍喺體育方面嘅經驗喎，咁其他方面呢？
卜錦文批Tim霍善忘
馬逢國回答後已點到即止，好厚道冇再向Tim霍落井下石，但並非所有人都識得「隱惡揚善」嘅藝術嘅。馬逢國尋日到奧運大樓洗樓拉票時，香港舉重健力總會副主席兼秘書卜錦文就大呻話，依家香港只得一個地方有舉重場地，希望可以爭取多啲場地配合喎。當問及有冇同Tim霍反映有關訴求，卜錦文暗批Tim霍可能係貴人善忘，睇嚟馬逢國日後處理業界訴求時都係小心為上。同界別候選人仲有周俊輝及蕭思江。