政情：鬼月搬入官邸 林鄭裝修慳家
農曆七月相傳鬼門關大開，中國人通常唔會喺呢個月搬屋，但出名「好打得」嘅政務司司長林鄭月娥就未驚過，喺啱啱過咗嘅周末，低調搬入山頂白加道政務司司長（CS）官邸。林鄭仲貫徹特首梁振英（CY）政府慳得就慳嘅作風，只係約花一百二十萬元裝修官邸，比起當年兩名前任司長唐英年同「貪曾」曾蔭權遷入時分別花費四百萬元及三百二十多萬元裝修，慳足六至七成。
眾所周知，林鄭老公長居英國，兩個仔亦只會喺放長假時偶爾返港，一個人住毋須大事裝修。加上前任司長林瑞麟並無搬入官邸居住，之前無人住開，搞裝修亦自然簡單得多。據聞今次CS官邸裝修，基本上只係按建築署建議，定期修葺下官邸嘅外牆同排水設施，無任何因為林鄭個人喜好而要大花公帑嘅項目，故裝修費較低。
林鄭之前一直租住位於陽明山莊嘅一個千多呎單位，相信個人物品唔多，聽聞佢已經喺剛過去嘅周六及周日運晒過官邸。翻查資料，林鄭喺嗰兩日有好多公開活動同內部會議，都唔明佢點解仲有時間搬屋囉！