政情：黃成智拗直論 辣慶同志
民主黨新界東候選人黃成智近日醜聞纏身，本報早前獨家踢爆佢涉嫌以名下機構及友好組織名義喺選舉期間向區內老人家免費派發麵包，令人質疑佢賄賂選民；之後黃成智又發表「剩女唔結婚係為咗搵更多性伴侶」嘅惹火言論，迅速辣慶本港大批高質素嘅剩女，大鬧佢唔尊重女性。點知一波未平，一波又起，佢喺競選宣傳單張鼓吹「拗直」治療再辣慶同志團體，被批評為「道德塔利班」，佢真係得罪人多稱呼人少呀。
黃成智「剩女論」嘅惹火言論已傷透女性心，有人要求佢道歉，仲有人揚言要喺下月立法會選舉用選票踢佢出立法會。佢呢番侮辱言論已喺日前論壇被對手猛烈攻擊，但佢仲擔心對手唔夠「彈藥」，喺自己嘅競選宣傳單張上提及同性戀人士，但唔係支持同性戀，而係硬銷自己曾經「關注當同性戀人士希望脫離同性戀生活方式或改變性傾向時，政府有沒有提供適切的支援」，被指變相鼓吹「拗直」治療。
黃成智宣傳單張呢則關注同性戀支援嘅「功績」，隨即喺社交網站瘋傳，其中「同志公民」組織對佢嘅政績相當不滿，批評佢推動「拗直」治療及抹黑同志服務。有網民話件事證明黃成智視野狹隘，心存偏見同無公義之心，正一「道德塔利班」，有人仲大鬧佢話：「真係冇嘢好講，不如九月九日趕佢落台！」有網民仲話，其實全球好多專業團體已反對改變性傾向治療，黃成智咁講擺明就缺乏政治智慧。
死撐屬一場誤會
我哋就此事問過黃成智，佢死撐話只係有專門協助同性戀者脫離同性戀生活嘅組織搵佢幫忙，想佢問吓政府能否提供支援，並非佢鼓吹「拗直」治療，純粹一場誤會。不過，同志組織已講明反對「拗直」治療，黃成智為推銷議會政績而毫不慎言，好明顯係缺乏政治危機意識，再係咁嘅話，佢嘅選情真係岌岌可危。
新界東候選名單仲有梁國雄、劉慧卿、陳克勤、葛珮帆、陳志全、葉偉明、龐愛蘭、田北俊、湯家驊、張超雄、蔡耀昌、范國威、邱榮光、方國珊、何民傑、梁安琪、陳國強及龐一鳴。