政情：中環出更：工總主席鍾志平終身學習
工業總會主席兼「電鑽大王」鍾志平（Roy）最近開心事停不了，事關啱啱落幕嘅香港小姐選舉，阿Roy首次獲邀做評判，近距離睇盡城中靚女，認真大飽眼福。佢最近仲成功攻讀澳門城市大學博士學位，成為佢第四個博士銜頭，其中兩個係榮譽博士，兩個係挑燈苦讀而來，真係唔講得笑。一班工業家老友都戥佢開心，早前「家電大王」德國寶主席陳國民做東，齊齊為阿Roy終身學習精神飲杯。
阿Roy已屆耳順之年，卓妮問佢點解仲咁投入做學生哥？佢睩大對眼、理直氣壯話：「因為細個讀得書少囉！」原來阿Roy係澳門人，十六歲就來香港搵食，雖然憑實力及努力成為全球最大嘅電鑽廠商，但係細時未能完成學業始終令佢抱憾，於是就搏晒命讀書，讀到上晒癮。
當晚近三十名工業界老友現身撐場，包括電子業商會會長楊志雄夫婦、萬利玩具主席陳明耀、職業訓練局高等及專業教育科主管黃倩瑛、「糖薑大王」余達之孫女余皓媛，仲有工總副主席兼深水埗區議會主席郭振華等。
吳宏斌諗計減公司戾氣
美億珠寶創辦人雷雅婷及囡囡王淑筠（Diana）都有現身，Diana開心報喜話，旗下朱古力Venchi快將開第二間分店。
而「提升快樂指數基金」主席吳宏斌就話，諗緊夥拍生產力促進局合作推出「開心企業」標籤，只要僱主獲一定數量嘅員工推薦，即有機會獲得類似「商界展關懷」標示，包保公司少啲戾氣、多啲生產力喎！
卓妮