男兒有淚不輕彈，擔任「希望之友」教育基金會董事會主席嘅前警務處副處長馮兆元，早前到湖北巴東市探訪，眼見當地愛滋病孤兒嘅貧困苦況時曾幾度哽咽，於是決由原本淨係資助呢班孤兒讀到高中，改為資助到佢哋讀完大學為止。
前日係基金會資助湖北愛滋病孤兒三周年嘅日子，二十多個接受資助嘅孤兒特登畫咗一幅海報送畀基金會，以示感激，場面感人。
基金會已成立二十年，當年由六個警務人員創立，佢哋步行三十五日由蘭州到鄭州，籌得超過一百萬元善款，主要資助建立內地希望小學。直到○八年馮兆元加入基金會，當時佢得悉湖北好多愛滋病孤兒冇錢上學，於是積極籌款助學。由○八年起，基金會成員已經去過新疆、陝西、內蒙等地慈善步行，今年三月，馮兆元仲同四十一個基金會會員一齊喺江西步行一百公里，籌咗一百六十幾萬，善心滿瀉。