政情：鍾樹根拉票 似維修天橋
立法會選舉投票日就到，每區嘅候選人都出盡法寶爭取曝光，但用得唔好分分鐘有反效果。好似民建聯香港島候選人鍾樹根，尋日喺灣仔港鐵站行人天橋拉票，貪嗰度人流多，點知佢零舍特別，花一千元租咗架吊雞車（升降台）由地面升上去天橋，然後同班市民揮手。呢招的確新鮮，但唔少途人見到以為係工人維修天橋，所以冇乜人理佢，搞到鍾樹根好尷尬。
其實好地地點解要企喺「吊雞」拉票，唔索性上天橋拉票呢？點知呢個大疑團未解開，佢就話今次只係第一炮，除咗「上天」仲會「下海」，遲啲仲會租艘船向維港兩岸嘅市民拉票喎。
其實尋日鍾樹根架吊雞車都好大架，中午及放工繁忙時間停喺灣仔港鐵站外軒尼詩道路邊，好彩小巴及的士司機冇乜埋怨佢阻住上落客，否則就真係搵自己笨喇。
香港島候選名單仲有單仲偕、葉劉淑儀、劉健儀、劉嘉鴻、曾鈺成、陳家洛、王國興、何秀蘭、吳文遠、勞永樂、許清安、吳榮春、何家泰。