政情：立會加高「狗窿」減壓迫感
立法會大樓自去年入伙後一直被揭發問題多多，除咗出現滲漏、議員辦公室隔音差外，地下公眾入口更因為太細小而被標籤為「狗窿」。秘書處就趁依家休會，下定決心進行大執漏工程，除咗不斷修修補補外，最重要就係將「狗窿」加高開大啲，等議員同市民出入時唔會再有壓迫感。
立法會大樓面向維港嘅公眾入口自落成後一直畀人批評又細又陰暗，立法會行政管理委員會去年底已開始討論改建公眾入口，新設計包括加高樓底，以及將入口原本灰沉沉嘅石板改為印有波點圖案嘅透明玻璃板。秘書處話，玻璃板既會遮住入面嘅石屎橫樑外，又可以改善出入口嘅空間感，可謂一舉兩得。
不過，新設計淨係加高樓底，但闊度方面仍然無增加，有行管會成員解釋，由於唔可以隨便亂改樓宇結構，所以只能向高空發展。