政客被民間組織攻擊屢見不鮮，雖然唔會公開同人駁火，但點都會回應幾句，不過有啲政棍唔知係咪心虛，竟然唔敢回應人哋嘅質詢喎。好似因為外傭居港權及港珠澳大橋司法覆核兩單案而聲名狼藉嘅公民黨（公文袋）咁，近日落區拉票時，就接連受到愛護香港力量（愛港力）追住嚟鬧，但該黨都唔敢多出聲，無不拔腿就走、抱頭鼠竄。
公文袋空降新界西直選，意圖奪取兩議席，該黨候選人余若薇早兩日落荃灣宣傳時，遇上愛港力成員狙擊，余若薇成為眾矢之的，不斷被人質問對外傭居港權嘅立場，仲被人鬧係漢奸同賣港賊，但成班公文袋成員唔知點解全程都垂頭喪氣，只得幾位男成員識得用手機反拍愛港力。
愛港力得勢不饒人，足足跟住公文袋十幾分鐘，跟到佢哋返大本營先肯撤退；愛港力仲將狙擊短片放上網，短短時間已經有千幾人睇過。新界西候選名單仲有譚耀宗、陳恒鑌、梁志祥、麥美娟、麥業成、田北辰、梁耀忠、李永達、陳樹英、陳強、陳偉業、李卓人、曾健成、何君堯、陳一華。