政情：超級區會超級混亂
立法會選舉新增五席俗稱「超級區議會」嘅區議會（第二）功能界別議席，雖然選民一人有兩票確係新鮮事，可惜未選前卻接連出現技術問題。繼有市民完全唔知「一人兩票」點投票外，依家又有地方選區候選人入稟法院挑戰《立法會條例》中免費投寄選舉郵件嘅規定。雖然離立法會投票日仲有十幾日，但超級區議會選舉安排至今已經搞到一鑊粥，睇嚟選舉管理委員會主席馮驊真係有排煩。
毓民擬呈請推翻選舉結果
根據《立法會條例》第四十三條，每位立法會選舉候選人可以向當區居民投寄一封免費宣傳郵件。不過，呢條規定有唔少灰色地帶，由於有唔少政黨同時派人競逐超級議席及地方直選，於是喺宣傳郵件上一併印晒超級及地方直選候選人嘅資訊，變相喺超級議席郵件宣傳一次，地方直選嘅郵件又宣傳多次，較一啲只係參加地方直選嘅候選人多一次免費宣傳機會，於是惹來個別政黨或候選人爭議。
人民力量九龍西候選人周峻翹，上星期就入稟高等法院提出司法覆核，要求法院裁定《立法會條例》第四十三條無效。黃毓民仲話政黨利用條例雙倍宣傳，咁做明顯對無派人參選超級議席嘅政黨不利，揚言會追究到底，選舉完結後仲會申請選舉呈請推翻選舉結果。
早前已有政黨擔心市民對「一人兩票」嘅概念一無所知，據聞有人仲以為一張選票可以投兩個候選人。為免選民到時去票站投錯票令大量白票湧現，唔少政黨都紛紛喺全港各區設置模擬投票站教市民點投票。雖然佢哋咁做都可算係用心良苦，但教人唔好投錯票應該係選舉事務處嘅責任，但該處至今仍然對呢個問題好似視而不見咁，淨係喺幾個地方設置模擬票站就算數，試問又點可以喺短時間內教識選民投票呢？
超級區議會選舉之所以咁混亂，可能關乎政府官員事前未有深思熟慮所致，搞到麻煩一浪接一浪，睇嚟馮驊除咗喺選舉後要好好檢討，因為選舉混亂而可能招致嘅法律訴訟問題，睇怕佢都有排處理喇。九龍西候選名單仲有黃以謙、黃碧雲、譚國僑、黃逸旭、蔣麗芸、林依麗、梁美芬及毛孟靜。