政情：中環出更：電器公主英會考奪13A
十優狀元唔易做，考到十三Ａ真係難上加難。已故「電器大王」信興集團創辦人蒙民偉嘅愛女蒙珮兒（Perlie）就讀英國St. Mary's Calne女校，日前佢喺英國中學會考取得十三科全Ａ。據知該校每年只有兩至三人考獲全Ａ，Perlie笑言，放榜前一晚緊張到瞓唔着。有此驕人成績，佢話全靠爸爸教導有方，爸爸從來冇畀壓力佢，但叫佢做事一定要盡力而為，事關天才都要付出至有收穫。
曾記錯考試日激嬲爸爸
Perlie話，佢讀小學時有次記錯咗考試日期同科目，惟有臨場考天才，雖然最後成績唔算差，但佢就激到爸爸好嬲。「佢話只要盡咗力，做得唔好都唔緊要，但記錯考試日期，即係對自己不負責任，唔可以用嚟做藉口！」蒙民偉對囡囡有要求，亦都賞罰分明，Perlie考獲八級鋼琴試時，就買咗部新鋼琴畀佢，但係有附帶條件，就係要佢考到演奏級。
除咗讀書叻，Perlie音樂天分更高，年紀輕輕已經考獲鋼琴及小提琴演奏級，聲樂亦將考取第八級別。至於將來想讀邊科，Perlie話，爸爸生前最想佢修讀法律，事關呢行出路好，對囡囡將來做任何職業都有幫助。不過，Perlie話自己嘅興趣太廣，到依家都仲心大心細，可能會讀神學，訓練吓批判性思維喎！