政情：中環出更：彭太率400女童軍征絲路
行絲綢之路，遇到嘅奇景變化萬千，香港女童軍總監彭徐美雲早前率領四百位女童軍坐火車遠征絲路，十五天行程，日日有挑戰，彭太形容，帶隊心情緊張過嫁女。最令佢意想不到嘅事，係去到敦煌「鳴沙山」被當地電視台追訪，要求佢喺塵土飛揚嘅沙漠揭開口罩做訪問。此行除咗彭曉明做大義工擔任領隊外，囝囝彭穎生亦上京支持啟動禮，一家大細全程投入女童軍活動。
一眾女童軍早前浩浩蕩蕩由北京出發，走訪西安、甘肅，感受絲路名勝古蹟，首次體驗喺火車度宿滋味，難得團友們好團結，唔單止無爭房瞓、爭洗手間用，仲將每卡列車貼滿海報，夠晒溫馨。
獲「克林頓式」招待
團友抵達西安後，獲當地旅遊局以貴賓式歡迎，派出穿上唐代服飾嘅美女，又擊鼓又跳舞迎接，聽聞美國前總統克林頓當年到訪，都獲得呢種上賓式招呼。
團員除咗參觀景點外，彭太仲安排女童軍參加蘭州一間實驗中學嘅開放日，一齊唱歌跳舞，之後與甘肅張掖市一班小數民族學生喺草原上互動交流，齊齊學吓織繩結，全程笑聲不絕。可惜去到張掖市時，彭太同老公彭曉明喺酒店食早餐，因為地板太滑，偶一不慎跣倒，當堂嚇親老公。不過，彭太堅持繼續行程，笑言好彩平時有跳舞底子，筋骨柔軟，所以冇乜大礙喎。
卓妮