倫敦奧運中國金牌運動員訪港旋風尋日進入高潮，精英健兒大晒冷，羽毛球超級丹同乒乓男單冠軍張繼科玩Crossover，觀眾拍爛手掌；新進跳水王后亮相，風采艷絕全場；「奧運金牌精英大匯演」同樣令市民過足癮，連班港府高官都睇到唔識眨眼。
政務司司長林鄭月娥話，呢次中國得獎精英好多都係第一次出征奧運，首戰告捷反映國家喺培訓運動員方面做到薪火相傳。開講有話，知恥近乎勇，希望高官今次真係開竅，檢討吓點解本港體育發展好似王小二過年咁，一年不如一年。
就講奧運獎牌呢筆，自從「風之后」李麗珊九六年喺亞特蘭大創造歷史為香港首次奪金，十六年來一共四屆奧運，港隊只有兩屆攞到獎牌，其他全部食白果，而且獎牌級別愈攞愈低，○四年雅典奪銀，今次得一塊銅牌，你話唔心翳就假。
體育發展停滯不前，奧運成績每況愈下，港府有不可推卸嘅責任。係人都知，當局口口聲聲撐體育，其實從來只得三分鐘熱度，一有本港健兒創佳績、攞獎牌就出嚟抽吓水，做完騷就冇咗件事。
呢，本港曾被譽為亞洲足球王國，仲出現過「亞洲第一中鋒」添，但近年本地足球每況愈下，國際排名不斷下滑，主要原因係長期缺乏政府支援。三年前港隊勇奪東亞運男足金牌，當局對足球發展由不聞不問到突然關心，仲話五年內會投入近億元提高港隊嘅國際排名，點知市民練波場地長期丟空居然冇人理，撐足球根本就係大隻講。
單車運動亦好唔到去邊，「車神」黃金寶獲獎無數，享譽亞洲揚威國際，港產官僚除咗利用阿寶戰績為自己貼金，為發展單車運動做過乜？本港到依家都冇一個符合國際標準嘅室內單車場，搞到運動員要山長水遠北上甚至出國訓練，你話係咪丟架吖。
講到推動全民運動更加係得把口齋噏。單車運動既環保又慳錢又健康，加上明星效應，本來好有前景。誰不知本港單車徑根本冇形成網絡，好似斷橛禾蟲咁東一段、西一段，中間駁唔埋，而且安全指引又唔足夠，隨時車毀人亡。強身健體變咗攞自己條命較飛，問你驚未，叮！
體壇精英離港，金牌騷曲終人散，功夫茶都係嗰句，港府應該好好反省，增撥資源做多啲實事，例如起多幾條單車徑、跑步徑，充分利用現有場地開展足球運動咁，為全民參與體育創造條件，而唔係做場大龍鳳就算，借熠熠星光為發展體育不力遮醜，熱潮過後，一切照舊，叮！