政情：吳永嘉組重慶幫創商機
過去已有唔少內地省市商家紛紛喺香港插旗成立組織，繼上海幫、潮州幫及福建幫後，重慶幫都發圍。香港廠商聯合會副會長兼重慶市政協吳永嘉（Jimmy）宣布成立「香港重慶總會」，搵嚟「中國水泥大王」董瑞寶做會長，更請到重慶富商張松橋擔任名譽顧問，真係粒粒皆星。
總會已密鑼緊鼓籌備當中，預計明年初正式成立，核心會員包括「家用磅大王」查毅超及港島各界聯合會理事長蔡毅，而Jimmy就做副會長，咁多大商家射住，總會經費唔使擔心啦。重慶幫到底有乜搞作呢？Jimmy話，總會將關注及發掘重慶嘅發展機遇，事關當地經濟起飛，零售同房地產生意愈做愈有，成立總會後可出師有名，考察交流都易好多。
籌組總會以外，Jimmy日前去台南高雄玩幾日，順便同太太Esther慶祝生日。高雄東港盛產黑鰭吞拿魚，魚油豐富，令Jimmy食到唔停口，佢又品嘗一味以金門高粱醃製而成嘅黑鰭吞拿魚子，再勁擦台式麻辣火鍋，搞到短短四日肥咗三磅。