政情：梁太新裝盡展親民
梁振英當選咗做特首之後，一言一行都受到市民同傳媒嚴格監督，佢太太梁唐青儀榮升特首夫人之後都唔好過，出席大小場合都畀人評頭品足，不時被指衣着打扮過於隆重，經常一身大紅大紫。梁太尋日以一身白色同淺灰色打扮出席活動，就廣獲好評，清淡得嚟又不失高貴。
梁太尋日親臨天水圍，擔任香港婦聯廖湯慧靄天晴綜合服務中心嘅開幕禮主禮嘉賓，衣着打扮明顯出現變化，畀人煥然一新嘅感覺。
佢以白色上身襯衣，襯托一身淺灰色並帶有少許蝴蝶碎花嘅絲質套裝，再配上一對黑色高踭鞋、一對珍珠耳環、同一條附有白色和灰色珍珠嘅長頸鏈，就連眼鏡都係白色框，真係襯到絕，予人華而不奢、既高貴又唔過火嘅感覺。
梁太致辭時亦學晒老公嘅親民作風，不時稱呼在場婦女為姊妹，可惜佢可能有啲緊張，不時要低頭睇稿同有啲口窒。睇嚟梁太喺改進衣着品味之餘，要再跟丈夫學下演講技巧。