政情：白鴿打壓良心三俠
三名民主黨（白鴿黨）資深黨員羅國強、陳德明同楊錚日前向全體黨員發出公開信，譴責外號「李漢奸」嘅創黨主席李柱銘再賣黨，公然為競爭對手公民黨（公文袋）拉票；三人前日仲去咗廉政公署舉報公文袋香港島候選人陳家洛涉嫌冒認「教授」宣傳。不過，醜聞纏身嘅白鴿黨主席何俊仁（鐵頭仁），不但冇嚴懲李漢奸賣黨，尋日反而出聲明批評呢三位「良心黨員」。事件再次證明白鴿黨一言堂打壓異己，更印證該黨同公文袋存在秘密協議，喺今次選舉中互相放水。
開口埋口要求政府包容兼聽嘅白鴿黨，本身嘅打壓異己醜行可謂罄竹難書。該黨早年因為最低工資及政改方案立場唔同，將黨內嘅少壯派同改革派逼走，最近又因為應徵副局長及國民教育問題，同兩名資深黨員馮煒光及狄志遠鬧翻，其中馮煒光已憤然退黨，而狄志遠想與人為善，低調解決同黨高層嘅分歧，但結果好心着雷劈，該黨對佢採取紀律行動，證明該黨認真無情無義。
兩黨存秘密協議互放水
到今次三位黨員發信怒斥李漢奸賣黨，並到廉署舉報公文袋陳家洛，講到底都係為個黨好。眾所周知，香港島選情激烈，如果被公文袋同李漢奸「假告急」成功，狂吸八萬票保到陳家洛及陳淑莊兩位候選人雙雙入局，白鴿黨候選人就分分鐘意外落選，所以三位黨員怒斥李漢奸賣黨合情合理。至於本身只係副教授嘅陳家洛喺宣傳品中自稱「教授」，如果真係冇違法，由廉署查個清楚即可還佢公道。
不過，鐵頭仁不但冇譴責李漢奸嘅賣黨行為，尋日仲發聲明同三名「良心黨員」劃清界線，澄清三人嘅行動同該黨無關外，仲一口咬定有關投訴無理，甚至質疑三人製造分化，對佢哋嘅行為表示憤怒。鐵頭仁鬧到佢哋好似罪大惡極咁，唯一解釋就係白鴿黨同公文袋真係有秘密協議，白鴿黨要放水力保公文袋香港島候選人當選，以報答公文袋遏制前黨員施馬文出選超級區議會同鐵頭仁搶票。
超級區議會候選名單仲有陳婉嫻、劉江華、李慧琼、涂謹申、馮檢基及白韻琹。香港島候選名單仲有曾鈺成、鍾樹根、葉劉淑儀、王國興、劉健儀、勞永樂、吳文遠、許清安、吳榮春及何家泰。