勞工界立法會議員李鳳英放棄連任後，以為佢想歎吓世界，但尋日政府宣布委任佢做強制性公積金行業計劃委員會主席，代替民建聯進出口界議員黃定光出任呢個位，勞方取代資方，意義相當大。不過，好多人都唔知強積金行業計劃係乜，其實計劃係為飲食業及建造業呢類習慣以日薪形成式支付薪酬嘅行業度身訂造，事關呢兩種行業不時會出現勞資糾紛，搞唔好隨時引發大規模工潮，成為政府嘅政治炸彈。
以英姐勤奮嘅往績、多年為勞工爭取權益嘅經驗，以及多年同資方或政府討價還價嘅政治技巧，相信佢一定會密切睇住成個計劃運作。講開英姐，佢參與監督香港強積金運作嘅經驗已經相當豐富，佢喺○七年開始已經擔任積金局嘅董事會成員，就連財經事務及庫務局局長陳家強亦盛讚，話英姐對強積金事務具豐富經濟及知識，相信佢可以為委員會提出寶貴意見。
除咗英姐外，同屬勞聯嘅鄧家献亦獲委任做成員。資方方面，敍福樓集團董事總經理黃傑龍首獲委任做成員，太興燒味主席陳永安就續任成員。