政情：議員報販聯手遏私煙
新一屆立法會有十六人自動當選，佢哋理應可以優哉游哉等十月立法會復會，但部分人並冇鬆懈，繼續關心社會議題，好似飲食界張宇人同批發及零售界方剛就聯同「全港報販大聯盟」等組織，全力協助海關打擊私煙，佢哋喺前日嘅活動啟動禮上，一齊撕毀象徵私煙嘅模型，可見佢哋對件事幾上心。
煙草事務協會（煙協）前日推出「全民參與打擊私煙教育及宣傳活動」，聯同全港報販大聯盟發起誓師大行動，呼籲全港報販堅決唔賣私煙。煙協發言人章健華話，海關喺過去幾年竭力打擊私煙，但要遏止私煙活動，必須結合政府、業界同各地區組織力量，齊心共謀對策，故佢哋促請政府審慎檢視調整煙草稅嘅策略，減少誘發私煙嘅元素。
全港報販大聯盟主席廖社青就語重心長話，希望透過呢次活動可以提醒報販切勿犯險賣私煙，又相信有唔少市民為咗慳錢轉食私煙，並非好似政府一廂情願所諗會戒煙喎。