政情：天使葉劉落入蘭桂坊
立法會候選人為爭曝光各出奇謀，連平時嚴肅嘅新民黨主席葉劉淑儀都扮天使，尋日由支持者「蘭桂坊之父」盛智文陪同下到中環蘭桂坊拉票，好似提早參加哈囉喂（Halloween）派對咁。尋日正值葉劉牛一，佢愛女葉榮欣（Cynthia）特別喺佢巡遊蘭桂坊前，搞咗個驚喜生日派對，仲邀請咗啲親朋戚友出席，大家仲送咗對天使翼畀葉劉做生日禮物添，所以葉劉就變咗天使走去拉票。
葉劉巡遊蘭桂坊期間，盛智文陪伴左右，亦有酒吧顧客爭取機會跟葉劉議政，葉劉話咁樣落區好有趣喎。問盛智文點解支持葉劉？佢又會唔會支持其他候選人呢？佢話無論邊一個都好，做到嘢嘅就會支持。佢仲透露，自由黨主席劉健儀（Miriam）都搵過佢幫手，如果佢有時間嘅話，都會同Miriam巡遊一次蘭桂坊喎。葉劉同Miriam啲票源咁接近，兩個又爭得咁犀利，盛智文咁樣會唔會得失是但一邊o架？
香港島候選名單仲有單仲偕、劉嘉鴻、曾鈺成、鍾樹根、陳家洛、王國興、何秀蘭、吳文遠、勞永樂、許清安、吳榮春及何家泰。