政情：人民力量網絡人心
面對年輕新一代嘅選民，互聯網已經成為候選人不可或缺嘅宣傳工具，各政黨都明白互聯網嘅重要，但識唔識好好利用又係另一回事。一眾政治組織中，以被稱為激進泛民主派嘅「人民力量」將互聯網優勢發揮得最好，佢哋嘅立法會議員黃毓民喺某場立法會九龍西選舉論壇「秒殺」對手嘅短片，短短時間已經突破四十萬次點擊率，透過網絡分享令睇過嘅人不計其數，有效益過真金白銀賣廣告。
有人民力量核心成員話，由於佢哋支持者絕大部分都喜歡上網，故此只要充分利用互聯網，訊息就可以傳得又快又廣，彌補佢哋地區樁腳不足嘅缺陷。當電視台直播完選舉論壇冇幾耐，人民力量嘅支持者已經自行將精華片段剪輯好放上短片分享網站，一傳十、十傳百，但首要係佢哋嘅候選人攻擊對手要言之有物，同埋夠創意至得。
創作金句 激發情緒
有見及此，據聞一眾人民力量候選人細心創作一啲足堪玩味嘅金句迎戰選舉論壇，無論係寸對手又好、鬧對手又好，最緊要係做到鼓動人心、煽動情緒，成功嘅話，班支持者自然會將論壇嘅精華片段放上網。由於互聯網嘅應用無遠弗屆，只要其中一區論壇有「金句」爆出，其他區嘅支持者都會被牽動，一區發圍、五區受惠，成效仲好過派人參選超級區議會。
互聯網宣傳效用有幾勁？只要睇吓毓民喺論壇後支持度有幾高就明晒。最新民意調查顯示，毓民支持度有成百分之二十，仲未反映日前佢哋最新放上網嘅一段論壇精華片段，所以下次民調結果真係唔講得笑。人民力量玩上網玩到出神入化，相信其他政黨都心癢難耐，睇嚟佢哋真係要檢討吓點樣善用互聯網宣傳，唔係好似依家咁，報名之後即時停用自己個facebook咁無聊囉。九龍西候選名單仲有梁美芬、蔣麗芸、黃碧雲、毛孟靜、譚國僑、林依麗、黃以謙、黃逸旭。