唔經唔覺八月下旬嘞，再過冇耐就係九月，唔少爹爹媽媽同莘莘學子都會歡天喜地咁大叫：開學喇！
功夫茶都好懷念開學嘅日子，嗰一陣無憂無慮嘅那些年，確係令人回味無窮o架。之不過咁，功夫茶嘅記憶裏面絕對不存在「跨境返學」嘅情節，更加冇「危機處理」咁別開生面嘅課程，事關跨境學童係一種穿梭中港兩地嘅新興族群，功夫茶讀書年代係聞所未聞嘅。
跨境返學因乜事幹要接受危機處理嘅特殊培訓？主要係因為政府限制羅湖道禁區許可證，即係俗稱禁區紙嘅數目，搞到不少學童冇得利用禁區紙乘搭保母車過境。你知啦，學生一旦冇得乘搭保母車，咁就有必要自行冒險過關，當中嘅危險包括遺失證件、遭受欺凌以及被迫運水貨等等。所以咯喎，有社會服務機構因應家長要求，打算開辦危機處理課程，教導學童如何見招拆招將問題一一化解。
嗱，講到呢度自必然要介紹一下禁區紙唔夠分嘅原因，咪就係雙非孕婦來港產子嘅後遺症囉。雙非孕婦誕下雙非嬰兒，雙非嬰兒長大就會變成雙非學童，雙非學童數目不斷增加，跨境返學嘅情況就會愈來愈頭痛。當局估計，新學年跨境學童將會急增五千人至一萬七千人，你都咪話唔得人驚，羅湖關口毫無疑問會成為人潮洶湧嘅重災區。雖然當局推出多項措施處理學童過境，包括喺關口增設校巴泊車位、實行直通巴車上檢等等，但都解決唔到問題。喂，學童禁區紙只有二千六百張咋，僧多粥少嘅情況肯定會造成大量學童自行冒險過關，求其有一個蕩失路都唔知點算好。
跨境學童愈來愈多其實仲會帶來骨牌效應，位於新界北區嘅學校人滿為患之後，居住於新界北區嘅學生居然冇學位讀書，被迫走去其他地區就讀。亦即係話，居住於內地嘅學生固然要跨境返學，居住於北區嘅學生同樣要跨區返學，一個二個頻頻撲撲。
有冇辦法改善跨境以及跨區返學嘅情況呢？今年六月，有北區學童同家長去到新政府總部請願，要求教育局盡快增撥額外資源增加學額應急，畀學童原區就學，並且去信當時嘅候任特首梁振英，要求關注北區學額不足嘅問題。冇錯嘞，增加學額未嘗唔係一個可行建議。
跨境學童今年估計急增至一萬七千人，原來明年仲勁，係二萬二千幾人呀老友。計功夫茶話齋，民生無小事，世上無難事，新政府係時候諗諗計喇，否則，跨境學童嘅問題隨時變成計時炸彈！