政情：嫻姐葉偉明改行做三行
立法會候選人拉票各出奇謀，有個別候選人零舍鍾意「扮嘢」，好似工聯會超級區議會候選人陳婉嫻（嫻姐），繼之前扮過農夫及侍應後，尋日再扮三行工人，與新界東候選人葉偉明一齊掃灰、砌磚。嫻姐話，希望表達對本港建造業發展嘅關注，並促請港府喺將建造業專業化時，唔好樣樣做少少，搞到政策流於表面喎。
尋日嫻姐扮三行工人都扮得有板有眼，仲被師傅讚佢有少少天分添。嫻姐話，雖然今次唔係第一次砌磚，但為免喺鏡頭前失手，早咗一個鐘到現場練習，仲話做到周身泥，愈做愈開心。嫻姐仲透露，會繼續扮嘢，因為依家已經有唔少工會同佢哋接觸，所以希望趁今次大型選舉，多啲表達香港需要發展多元經濟嘅聲音。
超級議席候選名單仲有劉江華、李慧琼、何俊仁、涂謹申、馮檢基及白韻琹。新界東候選名單仲有張超雄、田北俊、陳志全、劉慧卿、黃成智、蔡耀昌、范國威、湯家驊、陳克勤、葛珮帆、梁國雄、龐愛蘭、邱榮光、何民傑、梁安琪、方國珊、陳國強及龐一鳴。