繼前日兩位立法會法律界功能界別候選人互鬥「揭紅」，互指對手同西環有幾稔熟後，尋日又輪到兩位醫學界候選人玩自爆，承認曾經接觸西環，莫非佢哋想暗示自己「紅」啲？不過，「怪醫」梁家騮話已向西環表明唔希望選舉被干預，亦唔使佢哋支持。至於醫學會會長謝鴻興就話西環冇講過支持佢，佢亦唔認為西環可以影響到選舉喎。佢哋仲強調，如果入咗立法會，唔加入任何政黨或聯盟，會保持獨立身份。
對於社會上有人建議應該以人大釋法去解決雙非嬰兒居港權問題，謝鴻興話不反對釋法，支持任何可以解決問題嘅手段；但怪醫就認為釋法缺乏準則，覺得修改基本法更能凝聚社會共識。
佢哋又討論公立醫院輪候時間長嘅問題，一致認為並非醫生不足，矛頭直指醫管局出問題，前者指醫管局包攬太多服務，而後者就批評醫管局分配資源不均。兩人嘅立場咁相似，唔知業界內一萬一千個選民點投票呢？