立法會選舉期間，舉辦活動或邀請候選人出席活動要分外小心。香港大學《學苑》尋日有單報道，話港大學生會大前日（十九日）為班大學新生搞咗個迎新高桌晚宴，邀請嘅嘉賓之中，包括香港島候選人曾鈺成，但未有邀請同區其他候選人，質疑呢個高桌晚宴變質成為選舉晚會，學生會可能觸犯選舉條例。
我哋曾經嘗試聯絡學生會負責人，接聽電話嘅內務副會長張楚晞指會長陳冠康忙緊迎新活動，未有空回應事件。
有關報道指，曾鈺成喺晚宴上演講咗成半個鐘，雖然未知言論有否涉及選舉宣傳，但都分享咗自己嘅事迹。根據《立法會選舉指引》第十章，曾鈺成喺晚宴唱「獨腳戲」，可能被定義為選舉聚會，事關有可能影響出席學生嘅投票意向。至於第十三章「在學校內進行或有學生參與的競選活動」指引中更加指明，候選人喺學校舉行嘅專題講座，可能有宣傳、推廣作用，應被視為有關候選人嘅競選活動，睇嚟搞活動真係要小心為上。
香港島候選名單仲有許清安、單仲偕、勞永樂、劉嘉鴻、鍾樹根、吳榮春、何秀蘭、葉劉淑儀、王國興、陳家洛、何家泰、劉健儀及吳文遠。