政情：貪曾遺臭 港廉潔掃地
東方報業集團早前獨家揭發「貪曾」曾蔭權多宗貪腐醜聞，包括接受富商嘅超豪遊艇同私人飛機款待，又企圖以超平租金租住富商名下嘅「深圳禮賓府」，甚至連內地省市以慶回歸名義送畀特區政府嘅名貴茅台酒都貪。最新一項民意調查顯示，市民對本港嘅廉潔形象評分大跌，創下近十年來新低。貪曾呢位「香港第一貪官」在任短短七年，將香港自七十年代以來建立嘅「廉潔之都」形象敗壞到化為烏有。
跌破7分水平
港大民意研究計劃喺本月上旬訪問咗一千零四十名市民，結果顯示新任特首梁振英（CY）上台後，市民對本港多項社會、法治同自由指標嘅評分，都較半年前貪曾當權時有所上升。調查列出嘅五項核心社會指標當中，就有多達四項上升，其中安定指標勁升零點二分至七點二二分，反映「曾落梁上」後本港社會氣氛顯著趨安定。另外法治指標亦唔輸蝕，升零點零八分至七點二六分，創九七回歸以來新高。
七項非核心社會指標當中，亦有多達五項評分上升，包括治安、文明、社會福利、平等同公平指標，效率指標評分則維持不變，惟獨係廉潔指標就大跌零點七三分至六點六四分，不但係近年首次跌破七分水平，仲創下近十年來新低。雖然港大無詳細分析廉潔指標大跌嘅原因，但肯定唔關CY事，而係受貪曾醜行、以及同貪曾關係密切嘅前政務司司長許仕仁嘅案件所拖累。
調查亦問咗市民對十項自由指標嘅評分，當中有七項評分上升，文藝創作自由、出版自由和新聞自由三項則下跌，其中文藝創作自由更加大跌零點一九分至七點四六分，創九八年以來新低，相信係同貪曾政府喺任期尾提出嘅版權修訂法、即俗稱嘅「網上廿三條」有關，再一次證明貪曾遺禍不淺。相信市民望廉政公署會認真公平咁徹查貪曾案，盡快將不法分子繩之於法，還全港七百萬市民一個公道，重建香港嘅廉潔奉公形象，否則「香港勝在有ICAC」呢句口號只會成為廢話。